Surbung Vanlawng Ttumnak: By Siang Kung Tz

Surbung Vanlawng Ṭumnak hi Falam Township, Chin State chungah sermi vanlawng ngan deuh ṭum khawhnak caah, a hmasabik an sermi asi tiin kan chimko lai. Nan theihcio btk.in, Chin astate chungah Myone pakua a um i, Myone pakhat le pakhat fawitein i tlawn khawhnak lamṭha zong kan ngeikho rihlo. Lamṭha cu chimlo, Myanmar ramchung State vialte lakah azeilei pohin asi afaakbik le aṭhangcholobik State tizongin chim kan sifawn rih.

Kan fing, kan tlang le leicung, leitang thilchuak nih Chinmi hna hi ankan dirkamh/bomhlo ruangah hi btk. dirhmun i kan dirnak hi asiko lai. Fur caan lebang ahcun, tilian le vawlei min atamtuk caah Myone pakhat le pakhat duhningin kan i tlawngkai kholo. Cupinah, Kawlram chung State dang hna he ṭhaṭhi in i peh- tlaih khawh zong asi fawnlo.

Culawng asi rihlo, ramchung State dang i aummi, Chinmi le ramleeng i aummi Chinmi hna nih Chinram chungah luh anduh tik ah, an khualtlawnnak lam he aa tlaimi ah harnak tampi antong tawn. Ka van pehduh rihmi cu, Dollar tampi dihin vawlei hmun dang² ah khual atlawng tawnmi, Tourists pawl kong he aa tlaimiah asi.

Chanthar ram tampi hna nih hibantuk Tourist pawl tangka zei mawzat laakkhawh hi an i zuam cio hna. Tourism Industry hi an GDP (Gross Domestic Product) a santer khotu pakhatah ahmangmi ram zong tampi an um cang. Kha btk.tiang ruah khawhnak lungthin kan ngeihding zong asicang tiin ka ruah.

Amuisam minung lung (heart) he aa lomi, “Rih” tidil (lake) hi Rihkhawdar, Falam Peng, Chin State ah aum i, Myanmar ram chung in siseh, ramdang in siseh, mi tampi nih hmuh anduh ciomi tidil asi. Rih tidil he i hlatlote i a ummi ; Nat Ma Tlang National Park tehna, Hringlang Tlang le Buannel hmun tehna hi Chin State le akiangkam ram hna nih pal anduh ngai² mi hmun zong ansi rih.

Chimlo khawhlo asimi cu, Chinmi cheuthum cheuhnih renglo cu Krifa kan si btk.in, biak nak leiah vawleicung hmun dang² Krifa ram hna he naihtein rian ṭuanṭinak ngeih asi zungzal. I tlawn, i kai i, conference, meeting tbk. i hmuhtonnak atu le atu ngeih lengmang asi.

Hmailei zong ah hibantuk i hmuhton buin khua-khaan lairelṭinak ngeihchin peng ding kan sirih lai. Chimlomi tampi aum rih nain, asau sual lai. Cu caahcun, Chin State nih zeitik caan pohah caan dihlotein vanlawng ngandeuh ṭum khawh nak Airport (vanlawng bual) ngeih hi kan herh khunnak cu asi.

Chin State cozah nih Surbung vanlawng tual lawng siloin, Tidim, Tonzang, Hakha, Thantlang, Matupi, Mindat, Paletwa peng hna ah Airport ngeih khawhnak dingah, timhlamhnak akalpi cuahmahko tiin thawngṭha tete zong theihchin lengmang asi.

Surbung vanlawng tual he pehtlaiin, an timhlamhning report (technical report) ka theihhngalh tawkin ka van ṭial rih lai. Surbung Airport hi Surbung Tlangcung pe 6000 asannak hmunah sermi asi i, ram akauhning (area) hi 1289 acre renglodeuh asi rih.

Vanlawng ṭumnak caah adihmi tangka hi 32.36 billion Kyat (US$ 1.19 million) asi i, kum 2016 – 17 khan rianṭuan hramthok asi cang. Kum 2022 ah dih dingin timhtuahnak ngeih asi. (Project ningin chim ahcun). Mahhi Airport Project adihlak te i an ṭuandih hlan, kum 2020 September thla chungah vanlawng tliknak (runway) cu dih i, a hawnnak zong ngeih si teseh tiin NLD cozah nih timhlamhnak akalpilio asi.

Zeidang aherhmi; Terminals, Facilities & Equipment, Flight Control Systems, Runway Lights tbk. cu hnuhniang, kum 2022 dih hlanah liim dingin ruah asi. Union Fund in sermi Airport asi caah, kumkhatah 5 billion Kyat hi chuahpiak (peek) ansi lengmang lai i, atu i an tuaktaan cangmi tangka (Estimated Amount) nih adaihlo sual ahcun, 10 billion Kyat tiang chapkhawh dingin kalpi asi rih.

Zeipoh va siko seh, Surbung vanlawng ṭumnak cu Chin ram chungteah ser hmasabikmi asiko caah, Chinmi dihlak kan ta asi. Kan ta, Chinmi nih kan ngeih rihlomi Airport umchun asi caah, daw usih law, atlamtlin khawhnak tiang azohkhenh i zuam hna usih.

Credit: Sk Tualzik

Be the first to comment on "Surbung Vanlawng Ttumnak: By Siang Kung Tz"

Leave a comment

Your email address will not be published.


*